Landafræðikunnátta í molum

Fleiri banda­rísk ung­menni geta fundið á landa­korti eyj­una, þar sem síðasta Survi­vor-þáttaröð gerðist, en Af­gan­ist­an, Írak eða Ísra­el.

Þetta er niðurstaða könn­un­ar sem banda­ríska tíma­ritið Nati­onal Geograp­hic lét gera.

Lagðar voru landa­fræðisp­urn­ing­ar fyr­ir 3250 ung­menni á aldr­in­um 18-24 ára í Banda­ríkj­un­um, Kan­ada, Mexí­kó, Frakklandi, Þýskalandi, Ítal­íu, Svíþjóð, Bretlandi og Jap­an.

Aðeins 17% af banda­rísku ung­menn­un­um gátu fundið Af­gan­ist­an á korti þótt landið hafi verið í frétt­um nán­ast stöðugt í rúmt ár. Enn færri gátu bent á Írak eða Íran á korti af Miðaust­ur­lönd­um og Asíu.

Þá gátu aðeins 14% Banda­ríkja­mann­anna fundið Ísra­el. Raun­ar gátu aðeins 25% af úr­tak­inu í heild fundið landið og um 30% ung­menn­anna gátu ekki bent á Kyrra­haf, þótt það nái yfir þriðjung af yf­ir­borði jarðar.

Það Evr­ópu­ríki sem flest­ir Banda­ríkja­menn þekktu var Ítal­ía, senni­lega vegna stíg­véla­lög­un­ar­inn­ar. Og 34% ungra Banda­ríkja­manna gátu fundið eyj­una í Suður-Kyrra­hafi þar sem síðasta þáttaröð Survi­vorþátt­anna gerðist. Þá gátu 9 af hverj­um tíu Banda­ríkja­manna bent á Banda­rík­in á korti.

Marg­ir ung­ir Banda­ríkja­menn vissu ekki hvað Banda­ríkja­menn eru marg­ir. Um 30% þeirra töldu þá vera 1-2 millj­arða eða um þriðjung mann­kyns. Þátt­tak­end­ur í flest­um öðrum lönd­um stóðu sig bet­ur þegar þeir voru beðnir um að segja hve marg­ir byggju í heimalandi sínu.

„Þess­ar niður­stöður koma á óvart og á marg­an hátt eru þær dap­ur­leg­ar," sagði John Fahey for­seti Nati­onal Geograp­hic stofn­un­ar­inn­ar.

Ung­menni í Svíþjóð, Þýskalandi og Ítal­íu stóðu sig best og svöruðu um 70% af spurn­ing­un­um rétt. Á eft­ir þeim komu Frakk­ar, Jap­an­ar og Bret­ar en Kan­ada­menn, Banda­ríkja­menn og Mexí­kó­ar svöruðu inn­an við helm­ingi spurn­ing­anna rétt.

Nati­onal Geograp­hic

• Blogga um frétt