Tvíhöfði snýr aftur

Útvarpsþátturinn Tvíhöfði fer aftur í loftið í byrjun febrúar á útvarpsstöðinni Skonrokki. Umsjónarmenn verða sem fyrr þeir Sigurjón Kjartansson og Jón Gnarr. Þátturinn var lagður af í febrúar árið 2002 en þátturinn mun nú taka við af Zombie, sem þeir Sigurjón og Dr. Gunni hafa stýrt. Dr. Gunni hyggst nú sinna öðrum störfum og segist Sigurjón hafa verið ánægður með samstarfið við hann. Enn fremur fagnar hann endurkomu Jóns í útvarpið.

Saga Tvíhöfða hefur verið ævintýri líkast. Þátturinn byrjaði á Rás 2 á sínum tíma, fluttist svo yfir á Aðalstöðina en síðar fóru þeir félagar á X-ið. Þeir stofnuðu svo eigin útvarpsstöð, Radio og fluttu sig þangað. Síðar varð Radio sameinað X-inu í Radio X, síðar bara X-ið. Þeir félagar eignuðust gríðarlegan aðdáendahóp og hafa m.a. gefið út nokkra hljómdiska. Brotthvarf Tvíhöfða á sínum tíma varð mörgum súrt í broti.