Velvet Revolver leikur í Egilshöll

Bandaríska rokksveitin Velvet Revolver mun halda tónleika í Egilshöll 7. júlí næstkomandi, að því er Ragnheiður Hanson tónleikahaldari staðfesti við Morgunblaðið í gærkvöldi. Sama fyrirkomulag verður á tónleikunum og á tónleikum Iron Maiden í júní, þ.e. húsinu verður skipt í A- og B-svæði. Miðasala verður auglýst síðar.

Velvet Revolver er skipuð Scott Weiland, fyrrverandi söngvara Stone Temple Pilots, þríeykinu Slash, Duff McKagan og Matt Sorum, sem áður voru í Guns n' Roses og David Kushner úr Wasted Youth.

"Velvet Revolver er stórt nafn og þetta verða stórir tónleikar. Þeir taka mestmegnis Guns n' Roses- og Stone Temple Pilots-lög á tónleikum sínum, auk eigin efnis," segir Ragnheiður en Velvet Revolver hefur sent frá sér eina breiðskífu, Contraband, sem inniheldur m.a. lögin "Slither" og "Fall To Pieces".