Hundurinn Glói varð fyrir óvæntri árás

Hundurinn Glói fékk sér sundsprett í Seltjörn í gær, en varð þá fyrir óvæntri árás þegar álft réðist til atlögu við hann. Segist eigandi Glóa, Ásta Kristín Óladóttir, halda að álftin eigi hreiður þarna skammt frá og hafi verið að verja það. Önnur álft hafi setið úti í hólmanum, líklega á eggjum. Glói hafi synt í land eins hratt og hann gat og þótt hann hafi sloppið ómeiddur úr þessari viðureign muni hann líklega ekki synda nálægt álftum á næstunni.