Apamálverk seldust fyrir metfé

Þrjú mál­verk eft­ir simp­ans­ann Congo seld­ust á upp­boði í Lund­ún­um í dag á jafn­v­irði 1,7 millj­óna króna og var sölu­verðið mun hærra en bú­ist var við. Kaup­and­inn var Banda­ríkjamaður að nafni How­ard Hong, sem sagðist vera áhugamaður um nú­tíma­list.

Congo var eitt sinn nefnd­ur „Cez­anne ap­anna" en hann varð fræg­ur á sjötta ára­tug síðustu ald­ar fyr­ir lit­rík af­strakt­verk sín. Mann­fræðing­ur­inn Des­mond Morr­is stóð á sín­um tíma fyr­ir sýn­ingu á verk­um Congos en hann var sann­færður um að ap­inn, og raun­ar aðrir apar, skynjuðu eðli mynd­list­ar. Gagn­rýn­end­ur voru hrifn­ir og skil­greindu mál­verk­in sem óhlut­bund­inn expressi­on­isma.

Picasso er sagður hafa hengt mál­verk eft­ir Congo upp á vegg í vinnu­stofu sinni eft­ir að hann fékk það að gjöf.

Þeir sem telja að Congo hafi verið raun­veru­leg­ur lista­api benda á að eft­ir að hann lærði að fara með pensla og hætti að reyna að borða þá, málaði hann alltaf inn­an marka strigans og virt­ist gera sér grein fyr­ir því hvenær hann hafði lokið við mál­verk.