14 eintök af nýju bókinni um Harry Potter voru fyrir mistök seld í lítilli bókabúð í bænum Coquitlam í Kanada. Dómari þar í landi hefur nú fyrirskipað eigendum bókanna að segja engum frá því hvernig bókin sé og skuli þeir skila bókunum aftur til útgefandans. Bókin kemur í búðir víða um heim á laugardag og fá þá viðskiptavinirnir bækurnar sendar aftur til síns heima.
Þá reyndi dómarinn að meina kaupendunum að lesa bókina en óvíst er með öllu hvort það hafi tekist.
Þegar er búið að prenta um 15 milljón eintök af bókinni, sem heitir Harry Potter and the Half Blood Prince. Aldrei fyrr hefur jafn stórt upplag af einni bók verið prentað í einu. Búist er við að bókin seljist betur en heitustu lummur - eða í mjög miklu magni. Að sögn fréttavefjar Sky er búist við að hún seljist í jafn stóru upplagi á laugardag og bókin Da Vinci lykillinn gerði í Bretlandi á einu ári.