Meintur bankaræningi gleymdi veski sínu og skilríkjum í Trustmark bankanum sem hann rændi í Columbus í Massachusetts í Bandaríkjunum á þriðjudaginn. Lögregla átti því ekki í miklum erfiðleikum með að hafa uppi á hinum 26 ára gamla Terrell Green og var hann ákærður fyrir ránið í gær. Að sögn lögreglu gekk maðurinn inn í bankann og rétti gjaldkera miða úr veski sínu þar sem hann hafði skrifað kröfu þess efnis að gjaldkerinn afhenti honum peninga. Hann komst síðan á brott með rúmlega 1.000 dollara, eða rúmlega 64.000 krónur.
Lögregla hóf strax leit að Green en hætti leit þegar hún fann veskið hans á gjaldkeraborðinu, en í því voru skilríki hans. Laganna verðir fóru því beinustu leið heim til móður Green og handtók hann þar sem hann gekk út um útidyrahurð hússins.