Með Harry Potter handritið í handfarangri

Breski rithöfundurinn J.K.Rowling lenti í útistöðum við starfsfólk flugvallar í Bandaríkjunum og komst með naumindum um borð í flug, þar sem hún neitaði að láta af hendi handritið af síðustu Harry Potter bókinni, sem höfundurinn vinnur nú að. Strangar reglur gilda um handfarangur í flugi til og frá Bandaríkjunum eftir að komið var í veg fyrir hryðjuverk um borð í flugvélum á leið til Bandaríkjanna fyrir skömmu.

Höfundurinn fékk að lokum að taka með sér handritið, vafið í teygjur. Hún segist þó hafa íhugað að fara með skipi ef hún fengi ekki að taka handritið með sér í handfarangri, en margt var þar handskrifað að sögn höfundarins auk þess sem átti engin afrit af því sem hún hafði unnið meðan hún dvaldi í Bandaríkjunum .

Rowling var á leið frá New York þar sem hún hafði tekið þátt í góðgerðarsamkomu ásamt höfundunum Stephen King og John Irving.

• Blogga um frétt