Clooney segist ekki geta boðið sig fram til forseta sökum kynlífsreynslu

Leikarinn og hjartaknúsarinn George Clooney segist ekki geta boðið sig fram til forseta Bandaríkjanna þar sem hann hafi stundað of mikið kynlíf um ævina. Clooney segist hafa sofið hjá alltof mörgum konum til að geta boðið sig samviskulaust fram til forseta.

„Ég hef mikinn áhuga á stjórnmálum en ef ég stefndi að því að bjóða mig fram til forseta kæmu nokkrar bitastæðar sögur upp úr kafinu," segir Clooney. ,,Ég hef líka neytt of mikilla eiturlyfja og farið í of mörg villt partí." Fleiri Hollywood-leikarar hafa lýst því yfir að þeir muni ekki bjóða sig fram til forseta, þar af Robin Williams sem viðurkenndi fyrir skömmu að hafa farið í meðferð við áfengissýki. Williams sagði orðrétt: ,,Ég gæti ekki boðið mig fram til forseta, Bill Clinton er Amish-maður í samanburði við mig."

Williams telur þó að leikarinn Jack Nicholson eigi að reyna fyrir sér í stjórnmálum þar sem hann eigi auðvelt með að tjá sig um fortíð sína. ,,Jack myndi segja: ,,Kynlífshneyksli? Hvað viltu fá að vita? Ég hef reynt allt. Tvisvar. Og ég á það á myndbandi!" sagði Williams og líkti eftir Nicholson af alþekktri snilld. BangShowbiz slúðurfréttaveitan segir frá þessu.

• Blogga um frétt