Eiginkona Silvio Berlusconis, Veronica Lario, fyrrverandi forsætisráðherra Ítalíu, hefur krafið eiginmanninn um opinbera afsökunarbeiðni vegna ummæla hans um aðra konu opinberlega.
Veronica Lario ritaði opið bréf sem var birt í dagblaðinu La Repubblica, sem þykir fremur til vinstri, í dag. Þar kvartar hún yfir hegðun eiginmannsins, sem hún segir að hafi eyðilagt sæmd hennar sem konu.
Í síðustu viku voru höfð ummæli eftir Berlusconi þar sem hann segir við konu sem kom fram ísjónvarpsþætti á einni af sjónvarpsstöðvum í eigu Berlusconi að ef hann væri ekki kvæntur þá myndi hann kvænast henni á stundinni. „Með þér færi ég hvert sem er," bætti Berlusconi við þegar hann talaði við aðra konu í þættinum.
„Ég tel að þessi ummæli eyðileggi ímynd mína sem konu," segir í bréfi Lario. „Því kref ég eiginmann minn og opinberu persónuna að biðja mig afsökunar opinberlega þar sem ég hef ekki fengið hana persónulega," að því er segir í bréfinu.
Berlusconi hefur ekki svarað bréfinu né beðið eiginkonuna afsökunar opinberlega. Þau hjónin sjást mjög sjaldan saman, samkvæmt því sem ítalskir fjölmiðlar segja. Mjög lítið bar á henni á fimm ára valdatíð Berlusconi sem forsætisráðherra. Hins vegar hefur hún í einstaka tilvikum greint opinberlega frá skoðunum sínum sem ekki eru alltaf í takt við skoðanir Berlusconi. Til að mynda í málefnum Íraks.