Upplýst hver Mona Lisa var

Háskólinn í Heidelberg hefur sent frá sér tilkynningu um að starfsmenn á vegum skólans hafi komist að því hvaða kona eigi bros Monu Lisu sem ítalski málarinn Leonardo da Vinci gerði ódauðlegt. Konan á myndinni heitir Lisa del Giocondo, eiginkona kaupsýslumannsins Francesco del Giocondo.

Samkvæmt upplýsingum frá þýska háskólanum hefur rannsóknarmaður á vegum skólans fundið gögn sem staðfesta að Lisa del Giocondo er konan á myndinni. Kemur þetta fram í texta sem ritaður er á spássíu bókar sem var í eigu vinar da Vinci.

Staðfestir þetta grun sem lengi hefur verið uppi um hver konan er  en það var strax árið 1550 sem rithöfundurinn Giorgio Vasari hélt þessu fram. Vasari tímasetti einnig gerð málverksins en samkvæmt honum var það málað á tímabilinu 1503-1506, samkvæmt tilkynningu frá háskólanum í Heidelberg. Málverkið af Monu Lisu eða La Gioconda á ítölsku er til sýnis í Louvre-safninu í París.

 Hægt er að lesa meira um tengsl Giocondo og Monu Lisu á Wikipedia

• 1 blogg um fréttina

Bloggað um fréttina

• Guðríður Hrefna Haraldsdóttir: Aftur?