Söngvari Velvet Revolver rekinn

Rokkhljómsveitin Velvet Revolver hefur rekið Scott Weiland, söngvara hljómsveitarinnar, vegna hegðunarvanda hans, að því er kemur fram í tilkynningu frá hljómsveitinni.  Slash, gítarleikari Velvet Revolver, segir persónuleg vandamál Weilands hafa neytt hljómsveitina til þess að taka þessa ákvörðun.  Þá segir Slash að hljómsveitinni sé hugað um tónlistina og aðdáendur sína, en að hugur Weilands sé hjá hvorugu.

Fram kemur á fréttavef BBC að Weiland, sem er 40 ára, hafi verið handtekinn nokkrum sinnum fyrir að hafa fíkniefni undir höndum, og að hann neiti að hafa ekið undir áhrifum í síðasta mánuði.  Weiland hefur einnig farið nokkrum sinnum í meðferð vegna fíkniefnavandamála. 
Búist er við að Weiland muni spila á tónleikum á næstunni með Stone Temple Pilots sem nýlega tóku aftur saman eftir nokkurra ára hlé.   Hljómsveitin hefur ekki komið saman á tónleikum síðan árið 2001.

• 2 blogg um fréttina

Bloggað um fréttina

• Þráinn Árni Baldvinsson: Væluræfill?
• Þorsteinn T Ragnarsson: Ég finn lykt af Guns n' Roses reunion!