Bannað að stríða rauðhærðum

Mick Hucknall, söngvari bresku hljómsveitarinnar Simply Red, segir að þeir sem stríða rauðhærðum vegna þess hvernig hár þeirra er á litinn séu engu betri en rasistar.

„Þegar fólk er uppnefnt af því að það er rauðhært er það ekkert annað en einelti,“ segir söngvarinn sem er að sjálfsögðu rauðhærður.

„Það veldur mér miklum áhyggjum að hugsa um sjö ára gömul rauðhærð börn sem verða fyrir einelti á leikvöllum, eingöngu út af því hvernig hár þeirra er á litinn. Þetta er eins og rasismi, kannski ekki alveg það sama, en hugsunin er þó sú sama,“ segir Hucknall sem átti meðal annars í ástarsambandi við leikkonuna Catherine Zeta Jones um tíma. Hann telur að fólk stríði honum út af afbrýðisemi.

„Sannleikurinn er sá að ef maður nýtur velgengni, hefur selt margar plötur og sofið hjá miklum fjölda fallegra kvenna verður sumt fólk afbrýðisamt.“ segir Hucknall, en fyrsta sólóplata hans, A Tribute To Bobby, kemur út 19. maí.