Davíð boðaði Sigurð Kára á leynifund

Alþingismaðurinn Sigurður Kári Kristjánsson gekk að eiga unnustu sína Birnu Bragadóttur fyrir stuttu og af myndum í Séð og heyrt að dæma var gleðin svo sannarlega við völd. En gleðin var síður minni hjá félögum Sigurðar Kára þegar að því kom að steggja drenginn.

Segir sagan að Davíð Oddsson Seðlabankastjóri hafi með atbeina vina Sigurðar Kára, hringt í brúðgumann og beðið hann um að hitta sig á heimili sínu og umfram allt halda fundinum leyndum. Þegar Sigurður kom á fundinn tjáði Davíð honum brúnaþungur að nú væri svo komið fyrir þjóðarbúskapnum að eina vitið væri að þeir tveir tækju málin í sínar eigin hendur og stofnuðu nýjan flokk.

Það má auðveldlega ímynda sér undrunarsvipinn á Sigurði Kára þar sem hann sat drykklanga stund undir fyrirlestri Davíðs um stefnumál hins nýja flokks og hvernig sá svipur breyttist um leið og vinir hans, sem legið höfðu á hleri, hrundu upp hurðinni nær dauða en lífi af hlátri.