Mamma Mía! þvílíkur fjöldi

Um 1.000 manns troðfylltu stóra salinn í Háskólabíói á föstudagskvöldið þegar bíógestum gafst tækifæri að taka þátt í myndinni Mamma Mía og syngja með hinum fjölmörgu Abba-lögum sem koma fyrir í myndinni.

Síðustu þrjár vikur hafa þrjár slíkar sýningar verið haldnar og hafa viðtökurnar verið með eindæmum góðar og miðar selst upp á skömmum tíma. Í ljósi vinsældanna var ákveðið að fá þær Selmu og Hönsu til að stýra söngnum á fjórðu sýningunni, og dugði ekkert minna en stærsti bíósalur landsins. Þá var píanóleikarinn Kjartan Valdimarsson einnig kallaður til. Eins og áður segir var troðfullt hús og komust færri að en vildu. Eru því taldar miklar líkur á því að enn einni söngsýningunni verði bætt við áður en langt um líður.

Hátt í 90 þúsund manns hafa nú séð Mamma Mia hér á landi, og situr myndin því í fjórða sæti á lista yfir mest sóttu bíómyndir allra tíma á Íslandi, á eftir Titanic, Return Of The King og Mýrinni.