Gollrir og Gandálfur snúa aftur

Leikstjórinn Guillermo del Toro staðfesti í útvarpsviðtali á dögunum að þeir Sir Ian McKellen, Andy Serkis og Hugo Weaving hefðu allir tekið að sér hlutverk í væntanlegri mynd um Hobbitann.

Þeir félagar hyggjast allir bregða sér í sömu hlutverk og þeir fóru með í þríleiknum Hringadróttinssögu hér um árið, það eru hlutverk Gandálfs, Gollris og álfakonungsins Elrond.

Enn hefur ekki verið ráðið í hlutverk Bilbos Baggins en leit stendur nú yfir.

Peter Jackson, sem leikstýrði þríleiknum, er framleiðandi Hobbitans, sem byggist sem kunnugt er einnig á bók J.R.R. Tolkiens um ævintýri íbúa Miðgarðs og nágrennis.