Minnisblað breytir ekki ferðaáætlun páfa

Talsmaður Páfagarðs segir að minnisblað, sem var lekið í fjölmiðla, muni ekki hafa áhrif á heimsókn Benedikts páfa til Bretlands, sem er væntanlegur til landsins í september. Minnisblaðið hefur vakið mikla athygli en svo virðist sem bresk stjórnvöld séu að hæðast að kaþólsku kirkjunni.

Breska utanríkisráðuneytið hefur beðist afsökunar á minnisblaðinu, sem það segir að hafa orðið til á hugmyndafundi. Þar er m.a. lagt til að páfi geti blessað hjónaband samkynhneigðra eða opnað stofu fyrir fóstureyðingar, að því er fram kemur á vef breska ríkisútvarpsins.

Fram hefur komið í breskum fjölmiðlum að skv. heimildarmönnum í Páfagarði sé óvíst hvort verði af heimsókninni. Talsmaður Páfagarðs, Federico Lombardi, segir hins vegar að málinu sé lokið af þeirra hálfu.

Lombardi segir að atvikið muni ekki hafa nein áhrif á heimsókn páfa, sem verður í Bretlandi frá 16.-19. september nk.

Breska utanríkisráðuneytið heldur því fram að ungur starfsmaður hafi skrifað niður umrædda punkta. Þetta sé bæði barnalegt og ruddalegt. Þetta endurspegli ekki skoðanir ráðuneytisins.

• Blogga um frétt