Banna skammtímaleigu til ferðamanna

Borgaryfirvöld í Barcelona hafa ákveðið að banna skammtímaleigu íbúða til ferðamanna. Þetta er gert vegna húsnæðisskorts og hækkandi húsnæðisverðs í borginni. Fari allt eftir áætlun mun bannið taka gildi árið 2029 en núgildandi leyfi renna út undir lok árs 2028. 

Um 10 þúsund leyfi hafa verið gefin út vegna skammtímaleigu í borginni en íbúðirnar sem um ræðir eru gjarnan bókaðar af ferðamönnum í gegnum vettvangana Airbnb og Homeaway. 

Frétt af mbl.is

Hótel í Frakklandi fara í mál við Airbnb

Einnig vandamál í París og Berlín

Borgarstjóri Barcelona, Jaume Collboni, segir mikinn uppgang í skammtímaleigu íbúða hafa valdið 68 prósent hækkun á leiguverði í borginni og sömuleiðis 38 prósent hækkun þegar kemur að húsnæðiskaupum. Með því að banna skammtímaleigu sé verið að ráðast á eitt stærsta vandamál borgarinnar. 

Barcelona er þó langt frá því að vera eina borgin sem hefur lent í vandræðum með skammtímaleigu til ferðamanna en það sama má segja um París og Berlín. Borgirnar þrjár hafa allar sömu sögu að segja, að skammtímaleiga ferðamanna ræni íbúa borgarinnar tækifæri til þess að fá langtímaleigusamninga, og hækki leiguverð á markaði. 

• Blogga um frétt