Bandaríska tónskáldið Philip Glass, einn höfunda tónlistarinnar í ballettsýningunni Wuthering Heights, sakar Rússa, sem hyggjast setja verkið upp, um að nota tónlist sína og nafn sitt í auglýsingum fyrir sýninguna í leyfisleysi. Hann sakar þá um hreinan hugverkastuld.
Tónverk ballettsins er ekki aðeins eftir Glass, heldur einnig eftir Hildi Guðnadóttur. Hún hefur ekki gefið frá sér yfirlýsingu varðandi málið.
„Notkun á tónlist minni og notkun nafns míns án míns samþykkis er sjóræningjastarfsemi,“ kemur fram í tilkynningu Glass.
Rússar hyggjast setja upp ballettsýninguna í óperuhúsi sínu í Sevastapol og eiga sýningar að hefjast í næstu viku. Glass birti tilkynningu á samfélagsmiðlinum X þess efnis og sagðist vita fullvel að hann gæti ekki sótt rétt sinn vegna stöðunnar á Krímskaganum og væru því alþjóðalög gagnslaus um þessar mundir.
Það stöðvar hann þó ekki í því að mótmæla þessum þjófnaði eins og fram kemur í tilkynningunni sem má lesa hér að neðan.
— Philip Glass (@philipglass) July 25, 2024