Joe Biden Bandaríkjaforseti segir að drápið á Hassan Nasrallah, leiðtoga Hisbollah-hryðjuverkasamtakanna, sé réttlætisaðgerð fyrir fórnarlömb hryðjuverkaleiðtogans.

„Hassan Nasrallah og hryðjuverkasamtökin sem hann leiddi, Hisbollah, báru ábyrgð á því að hundruð Bandaríkjamanna létu lífið í fjögurra áratuga hryðjuverkavargöld. Dauði hans í loftárás Ísraela er réttlætisaðgerð fyrir fjölda fórnarlamba hans, þar á meðal þúsundir Bandaríkjamanna, Ísraela og líbanskra borgara,“ sagði Biden í yfirlýsingu. 

Biden minnti á það að það voru Hisbollah-samtökin sem ákváðu að fyrra bragði að ráðast á Ísrael 8. október til stuðnings Hamas-hryðjuverkasamtakanna.

Frétt af mbl.is

Hisbollah staðfesta dauða leiðtogans

Markmiðið að draga úr átökum

Hann sagði að Bandaríkin myndu áfram styðja við rétt Ísraels til að verja sig gegn Íran og undirsátum þess í Mið-Austurlöndum eins og Hisbollah, Hamas, uppreisnarhóp Húta í Jemen og fleiri samtökum.

„Að lokum er markmið okkar að draga úr átökunum á Gasa og í Líbanon með diplómatískum leiðum. Á Gasa höfum við unnið að samningi sem öryggisráð Sameinuðu þjóðanna hefur stutt um vopnahlé og lausn gísla. Í Líbanon höfum við unnið að samningi sem myndi tryggja að fólk gæti snúið heilu og höldnu til síns heima í Ísrael og suðurhluta Líbanons.

Það er kominn tími til að þessir samningar náist, að ógnum við Ísrael linni og að aukinn stöðugleiki náist í Mið-Austurlöndum,“ sagði Biden í yfirlýsingu.

Hryðjuverkaleiðtoginn Hassan Nasrallah var drepinn í gær í loftárás Ísraelsmanna. AFP

Íran, Rússland og Sýrland fordæma drápið

Ríki eins Íran, Rússland og Sýrland hafa fordæmt drápið á Nasrallah ásamt palestínskum stjórnvöldum á Vesturbakkanum.

Samtök eins og Hamas og Hútar hafa einnig fordæmt drápið.

Antonio Guterres, aðalritari Sameinuðu þjóðanna, segir að hann hafi verulegar áhyggjur af stigmögnun átaka á svæðinu í kjölfar drápsins.

Frétt af mbl.is

Segir drápið leiða til „tortímingar“ Ísraels

Tengdar fréttir

Ísrael/Palestína

Segir drápið leiða til „tortímingar“ Ísraels

• 50 þúsund manns flúið til Sýrlands
• Aflýsa flugi til Beirút
• Hisbollah staðfesta dauða leiðtogans
• Segja leiðtoga Hisbollah látinn

» Fleiri tengdar fréttir

• Blogga um frétt