Þúsundir syrgðu fórnarlömbin 14

Þúsundir komu saman í dag í norðurhluta Serbíu til að syrgja þá 14 sem létu lífið þegar þak á lestarstöð hrundi í gærmorgun.

Á breiðgötu við stöðina kveiktu íbúar á kertum og lögðu niður blóm á meðan sumir héldu á hvítum blöðum með nöfnum fórnarlambanna.

Slysið varð snemma á föstudag á aðallestarstöðinni í borginni Novi Sad í norðurhluta landsins.

Kanna hver beri ábyrgð

Ivica Dacic innanríkisráðherra Serbíu sagði í dag að yfirvöld væru byrjuð að kanna hver beri ábyrgð á slysinu.

Sagði hann í viðtali við sjónvarpsstöðina Prva að saksóknari myndi yfirheyra 20 manns, allt frá viðeigandi ráðuneytum til starfmanna járnbrautafyrirtækis Serbíu.

Ástand þriggja sem slösuðust í óhappinu er enn talið alvarlegt.