Missti hönd eftir axarárás í París

Fjórir táningar særðust í átökum við árásarmann með exi í Frakklandi. Táningarnir voru á aldrinum 16 til 17 ára. Tveir særðust lítillega í átökunum en hinir tveir hlutu meiri háttar meiðsl. Annar þeirra hlaut höfuðkúpubrot og hinn missti höndina.

Árásin átti sér stað í morgun klukkan átta að staðartíma í lest í úthverfi Parísarborgar, þegar táningarnir voru á leið í skólann.

Um er að ræða E-línu RER-lestarlínunnar sem gengur frá austri til vesturs í gegnum borgina og úthverfi hennar.

Árásarmaðurinn sem var sextán ára var síðar handtekinn á heimili sínu og sætir gæsluvarðhaldi.

Ekki er vitað hver kveikja árásarinnar var en táningarnir voru þungvopnaðir. Var meðal annars notast við ofangreinda exi, hníf, samúræjasverð og hafnaboltakylfu.

• Blogga um frétt