Donald Tusk, forsætisráðherra Póllands, skýtur föstum skotum að Olaf Scholz, kanslara Þýskalands, í kjölfar þeirrar stóru árásar sem Rússar gerðu á Úkraínu skömmu eftir að Scholz hafði rætt við Rússlandsforseta símleiðis.

Vladimír Pútín Rússlandsforseti og Scholz ræddu saman í síma á föstudag og voru það fyrstu samskipti Pútins við vestrænan leiðtoga í nær tvö ár. Þýskaland átti frumkvæði að símtalinu, í óþökk stjórnvalda í Kænugarði.

Í nótt, tæpum tveimur sólarhringum síðar, létu Rússar sprengjum rigna víða um Úkraínu, þar sem þeir skutu um 120 flugskeytum og 90 drónum í átt að Úkraínu og er árásin sú stærsta frá því í ágúst. Flugskeytin náðu sum alla leið að vesturhéröðum Úkraínu, sem hafa hingað til verið í öruggri fjarlægð frá árásum Rússa.

Pólverjar eru því nú á hæsta viðbúnaðarstigi og vinna að því að smala saman flughernum vegna árásarinnar. Aðgerðastjórn pólska hersins skrifar á samfélagsmiðla að Pólland hafi „virkjað allar mögulegar hersveitir“ og að herinn sé á „hæsta viðbúnaðarstigi“.

Frétt af mbl.is

Risastór árás á Úkraínu: Pólverjar á varðbergi

Scholz og Pútín ræddu saman í síma á föstudag. AFP/Johanna Geron/Sergei Guneyev

Ræddi Trump við Pútín?

„Það stöðvar enginn Pútín með símtali. Árásin í nótt, ein sú stærsta í þessu stríði, hefur sannað að símadiplómasía komi ekki í stað raunverulegs stuðnings alls hins vestræna heims við Úkraínu. Næstu vikur munu ráða úrslitum, ekki aðeins fyrir stríðið sjálft, heldur framtíðina einnig,“ skrifar Donald Tusk, forsætisráðherra Póllands, á samfélagsmiðlinum X.

Washingt­on Post greindi frá því á dögunum að Trump hefði rætt við Vla­dimir Put­in Rúss­lands­for­seta skömmu eft­ir að sig­ur hans í for­seta­kosn­ing­un­um var staðfest­ur. Þar mun hann hafa beðið Pútín um að forðast frekari stigmögnun stríðsins, skrifar miðillinn, en talsmenn Rússa þvertaka fyrir samtalið.

Frétt af mbl.is

Segir Trump og Pútín ekki hafa rætt saman

Rússar og Úkraínumenn hafa ekki átt í neinum þýðingarmiklum samræðum frá því að stríðið hófst en endurkjör Trumps hefur stefnt framtíð átakanna í óvissu, þar sem Repúblikaninn hefur ítrekað lofað að ná samkomulagi um að binda enda á stríðið.

Pútín hefur sagst aðeins myndu samþykkja vopna hlé ef Úkraínumenn gefa upp þau landsvæði sem Rússar hafa lagt undir sig í innrásinni.

Selenskí opnaði fyrir diplómatískar leiðir, svo komu sprengjurnar

Volodimír Selenskí Úkraínuforseti sagði í gær að stjórnvöld í Kænugarði vildu fara diplómatískar leiðir til að binda enda á varnarstríð sitt gegn Rússum á næsta ári. Nokkrum tímum síðar hófst árás Rússa.

„Að okkar leyti verðum við að gera allt sem við getum til að sjá til þess að þessu stríði ljúki á næsta ári. Við verðum að ljúka því á diplómatískan hátt,“ sagði Selenskí við ríkisútvarp Úkraínu í gær.

„Við verðum að skilja það sem Rússarnir vilja,“ bætti Selenskí við. 

Loftvarnakerfi Úkraínumanna skaut niður 140 flugskeyti og dróna en Rússar hæfðu þó skotmörk í Kænugarði, Dnipropetrovsk, Donétsk, Lvív og Odesa, samkvæmt BBC. Orkuinnviðir eru skaddaðir eftir árásirnar og rafmagnslaust er á nokkrum svæðum í landinu.

Samkvæmt Kreml ítrekaði Pútín þá kröfur sínar í samtali sínu við Scholz á föstudag að Úkraínumenn yrðu að gefa eftir landsvæði sín. Selenskí hefur áður hafnað slíkum kröfum.

„Að okkar leyti verðum við að gera allt sem við getum til að sjá til þess að þessu stríði ljúki á næsta ári. Við verðum að ljúka því á diplómatískan hátt,“ sagði Selenskí við ríkisútvarp Úkraínu í gær. AFP

Tengdar fréttir

Úkraína

Risastór árás á Úkraínu: Pólverjar á varðbergi

• Stríðið endi fyrr með Trump í Hvíta húsinu
• Segir afstöðu Trumps margslungnari
• Skutu niður flugskeyti og dróna yfir Kænugarði
• Binda vonir við að Trump endi stríðið

» Fleiri tengdar fréttir

• Blogga um frétt