Skotinn til bana í Mexíkó

Norðmaður var skotinn til bana í leigubifreið í Mexíkóborg í Mexíkó aðfaranótt föstudags í árás tveggja manna á vélhjóli sem lítur út fyrir að hafa verið farangursrán.

Eftir því sem mexíkóska lögreglan greinir frá í fréttatilkynningu tók Norðmaðurinn, sem er frá Agder-fylki í Suður-Noregi, sér far með leigubifreiðinni á flugvellinum á Mexíkóborg og beiddist þess, að sögn bifreiðarstjórans, að verða ekið til umferðarmiðstöðvar borgarinnar, það er að segja áfanga- og brottfararstað langferðabifreiða.

Í fréttatilkynningu sinni segir mexíkóska lögreglan að henni hafi borist tilkynning um særðan mann í Jardín Balbuena-hverfinu og haldið á vettvang. Við komu þangað hafi lögregluþjónar hitt fyrir særðan mann í blóðugum fötum sem lá á götunni. Athugun sjúkraflutningafólks hafi ekki gefið nein lífsmörk til kynna og var fórnarlambið úrskurðað látið á vettvangi.

Skaut formálalaust gegnum rúðu

„Lögreglan ræddi við 39 ára gamlan mann sem kvaðst vera ökumaður gulrar og hvítrar leigubifreiðar og sagði frá því að skömmu áður hefði hinn látni sest inn í bifreiðina við álmu 1 á alþjóðaflugvelli Mexíkóborgar og beðið um akstur til umferðarmiðstöðvarinnar í suðurborginni,“ segir í tilkynningunni.

Meðan á akstrinum hafi staðið, og bifreiðin ekið eftir Circuito Interior-brautinni, hafi vélhjól með tveimur mönnum nálgast hana. Hafi annar þeirra lamið í afturrúðu bifreiðarinnar og svo formálalaust skotið í gegnum hana sem hafði þær afleiðingar að ökumaðurinn stöðvaði bifreiðina.

„Þegar hann steig út úr bifreiðinni sá hann farþegann liggja á götunni með farangur sinn við hlið sér,“ segir enn fremur í tilkynningu lögreglu, en norska ríkisútvarpið NRK segir frá því að tilræðismennirnir hafi haft tvær ferðatöskur á brott með sér.

Ráðuneytinu kunnugt um málið

Guri Solberg, vakthafandi upplýsingafulltrúi norska utanríkisráðuneytisins, segir í samtali við norska dagblaðið VG að ráðuneytinu hafi borist tilkynning um andlát norsks ríkisborgara í Mexíkó og kveður hún ráðuneytið nú rannsaka málið með aðstoð lögreglu og norska sendiráðsins í Mexíkó.

Norska rannsóknarlögreglan Kripos hefur enn fremur tilkynnt lögregluyfirvöldum í Agder-fylki um málið, en að sögn Terje Kaddeberg Skaar, rannsóknarlögreglumanns í Agder, er málið ekki til rannsóknar hjá lögreglu þar í fylkinu svo henni hafi aðeins verið tilkynnt um andlát Norðmannsins. Þetta hefur NRK eftir Skaar.

NRK

VG

Fréttatilkynning mexíkósku lögreglunnar

• Blogga um frétt