Eldar geisa í Malibu

Skógareldurinn Franklín sem hófst í gærkvöldi í Malibu í Kaliforníu breiðir nú hratt úr sér. Búið er að fyrirskipa rýmingar og hafa nokkur mannvirki orðið eldinum að bráð. 

Eldurinn braust út í gærkvöldi og á fáeinum klukkustundum hafði hann breiðst yfir 730 hektara samkvæmt CAL FIRE, sem sér um varnir gegn skógareldum í Kaliforníu.

Margar Hollywood-stjörnur og stjórnendur í kvikmyndaiðnaðinum eiga húsnæði við strandlengjuna, en svæðið er eitt það eftirsóknarverðasta í Suður-Kaliforníu.

Slökkviliðsmenn vinna hörðum höndum að því að hefta útbreiðslu eldsins. AFP/Getty Images/Mario Tama

Aflýsa kennslu og lokaprófum

Pepperdine-háskóli aflýsti kennslu og lokaprófum í dag. Fyrir utan bókasafnið í skólanum má sjá mikinn reyk og brennandi tré og eru nemendur því með grímur til þess að anda ekki reyknum að sér.

Í neyðartilkynningu frá yfirvöldum klukkan 11.22 að íslenskum tíma sagði að embættismenn væru að ganga í hús og rýma þar sem eldarnir ógnuðu heimilum.

„Malibu-bryggja og önnur mannvirki, og mannvirki á Malibu Knolls Rd og Sweetwater Cyn hafa orðið fyrir barðinu á eldinum,“ sagði í tilkynningunni.

Skógareldurinn Franklín. AFP/getty Images/Mario Tama

• Blogga um frétt