Rússnesk kona hefur verið dæmd í 15 ára fangelsi fyrir landráð fyrir að vinna fyrir Úkraínu, að því er kemur fram í tilkynningu frá saksóknaraembættinu í Rússlandi. 

Konan heitir Oksana Senejuk og hefur starfað sem sérfræðingur í borgarskipulagi og arkitektúr. Auk þess að þurfa að sæta fangelsisvist í 15 ár er henni einnig skylt að greiða 200 þúsund rúblur í sekt eða það sem nemur rúmlega 278 þúsund íslenskum krónum. 

Rússneskir saksóknarar sögðu að maður í úkraínsku leyniþjónustunni hefði ráðið Senejuk til starfa árið 2015 fyrir þáverandi ríkisstjórn í landinu. Á maðurinn að hafa haft samband við Senejuk á ný í mars á þessu ári þar sem hann skipaði henni að afhenda upplýsingar og ljósmyndir sem aðstoðaði Úkraínumenn við að finna skip rússneska Svartahafsflotans, segir í tilkynningunni. 

Fjöldi fólks hefur verið sakfelldur fyrir landráð og njósnir í Rússlandi frá því að Rússar hófu innrás í Úkraínu fyrir tæpum þremur árum. Hafa þau öll hlotið þunga dóma. 

Tengdar fréttir

Rússland

Geta ekki staðfest að flaugin hafi rofið lofthelgi

• Segja Norður-Kóreumenn hafa haft lítil áhrif
• Norðurkóreskir hermenn drepnir í stríði Rússa
• Sammála um að koma þurfi á „varanlegum friði“
• Norðurkóreskir hermenn felldir í Evrópu

» Fleiri tengdar fréttir

• Blogga um frétt