Erlent | mbl | 16.1.2025 | 20:50

Forsetamynd: Donald Trump brúnvölur

Stuðningsmenn Trumps segja á samfélagsmiðlum að myndin sé grjóthörð. Ljóst er að hér ekki um hefðbundna forsetamynd að ræða. Ljósmynd/Donald Trump

Ný forsetamynd af Donald Trump, verðandi forseta Bandaríkjanna, hefur vakið talsverða athygli. Myndin var birt í dag og á henni virðist hann setja upp álíka svip og hann gerði þegar tekin var af honum sakborningsmynd í Fulton-fangelsinu í ágúst 2023.

Svokallað aðlögunarteymi, sem sér um embættistöku Trumps, birti myndina af honum ásamt varaforsetamynd af J.D. Vance, verðandi varaforseta Bandaríkjanna.

Báðar ljósmyndirnar sýna repúblikanana í bláum jakkafötum, hvítum skyrtum og með blá bindi. Trump er einnig með bandaríska fánanælu í jakkanum.

Hér má sjá forsetamyndina í fullri hæð. Ljósmynd/Donald Trump

Hér má sjá varaforsetamynd J.D. Vance. Ljósmynd/J.D. Vance

Öðruvísi en myndirnar á fyrra kjörtímabili

Ljósmyndin af Trump minnir á sakborningsmyndina sem tekin var af honum í Fulton-fangelsinu í tengslum við ákæru gegn honum um að hann hafi reynt að snúa við niðurstöðum forsetakosninganna árið 2020.

Sakborningsmyndin af Trump. AFP/Fógetaembætti Fulton-sýslu

Daniel Torok, yfirljósmyndari Trumps, birti myndirnar á samfélagsmiðlum í gær en Trump tekur við embætti forseta á mánudag.

Forsetamyndin af Trump er talsvert öðruvísi en myndirnar sem hann notaði síðast þegar hann var forseti frá 2017 til 2021, eins og sjá má á eftirfarandi mynd.

Trump lét gera tvær forsetamyndir árið 2017. Myndin til vinstri var sú sem hann notaði fyrst en myndin til hægri er sú sem hann notaði restina af kjörtímabilinu. Samsett mynd/Bókasafn Bandaríkjaþings