„Þess vildi ég óska að ég gæti ábyrgst að ekkert meira gerðist, en ég ábyrgist að við gerum allt sem í okkar valdi stendur til að stemma stigu við þessum atburðum,“ segir Max Åkerwall, starfandi lögreglustjóri suðurumdæmis lögreglu sænska höfuðborgarinnar Stokkhólms, í samtali við þarlenda ríkisútvarpið SVT.

Sprengjutilræði hafa verið tíð þar á höfuðborgarsvæðinu upp á síðkastið. Seint á fimmtudagskvöldið sprakk sprengja við fjölbýlishús í Farsta í Suður-Stokkhólmi og mbl.is greindi frá tveimur sprengingum aðfaranótt fimmtudags, annarri við klúbbhús vélhjólaklúbbsins Bandidos í Haninge og hinni í Uppsala.

Frétt af mbl.is

Sprenging við klúbbhús Bandidos

„Við skoðum jafnan hverjir búa þar sem sprengingar verða til að átta okkur á því hvers vegna sprengt er á staðnum,“ segir lögreglustjórinn og kveður hvert sprengitilræði vera bút í púsluspil lögreglunnar í rannsóknum hennar á væringum glæpagengja í Stokkhólmi og nágrenni.

Bakmennirnir erlendis

Eins og mbl.is hefur greint frá beinist fjöldi skot- og sprengjuárása að öðrum en sjálfum klíkufélögunum. Gjarnan er ráðist að ættingjum þeirra, vinum eða vinnuveitendum og má nefna sem dæmi þegar handsprengju var varpað inn í matvöruverslun í miðbæ Södertälje í júlí í fyrra.

Var at­vikið talið hafa átt að skjóta liðsmanni glæpa­geng­is­ins Ronnafa­langen skelk í bringu en hann var þá skráður til heim­il­is í íbúðahluta húss­ins sem að hluta er atvinnuhúsnæði. Þetta hafði SVT eft­ir heim­ild­ar­mönn­um en lög­regla vildi þó hvorki segja af né á um sannleiksgildi þeirrar kenningar. Helsti sérfræðingur SVT um gengjastríðin ræddi við Morgunblaðið í vikunni:

Frétt af mbl.is

Uns allir deyja

Åkerwall kveður þróunina þá að skot- og sprengjutilræði séu jafnan pöntuð og unglingar undir lögaldri, jafnvel undir sakhæfisaldri, fengnir til að vinna verkin. Sé staðan nú orðið oftar en ekki sú að bakmennirnir og höfuðpaurarnir sem panta ódæðin séu staddir erlendis og þar með utan seilingar sænskra lögregluyfirvalda.

„Þetta eru oftast unglingar sem framkvæma þetta, strákar og stelpur,“ segir lögreglustjóri og bætir því við að enginn hörgull sé á tilræðismönnum, „Unglingar standa í röðum eftir verkefnum,“ segir Åkerwall í sjónvarpsviðtali SVT sem horfa má á undir efsta hlekknum hér að neðan.

SVT

SVT-II (sprengingin í Haninge)

Aftonbladet

Tengdar fréttir

Óöld í Svíþjóð

Sprenging við klúbbhús Bandidos

• Uns allir deyja
• Létust vera fjórtán ára
• 15 ára piltur látinn eftir skotárás
• Þekktur tónlistarmaður myrtur

» Fleiri tengdar fréttir

• 1 blogg um fréttina

Bloggað um fréttina

• Gústaf Adolf Skúlason: Dagleg sprengjuhryðjuverk í Svíþjóð – verst í Stokkhólmi