Kim og náttúruundrin

Frásögn af "náttúruundri" er tengdist heimsókn Kim Jong-Il, leiðtoga Norður-Kóreu, í múrsteinaverksmiðju fer nú eins og eldur í sinu um landið, að því er fréttastofan þar greindi frá í gær.

"Undrið" varð í borginni Hamhung í norðausturhluta landsins. Þar rigndi er leiðtoginn var væntanlegur, en um leið og hann kom fór að stytta upp. Þetta hefði ef til vill mátt segja tilviljun, en þegar leiðtoginn lauk heimsókn sinni og ók á brott byrjaði að rigna aftur.

Svipað "undur" varð fyrir nokkrum árum þegar Kim heimsótti Hamhung-deild n-kóresku vísindaakademíunnar. Á þeirri stundu sem hann birtist þar dró ský frá sólu, að því er fréttastofan greindi frá.

"Himinninn yfir Hamhungborg var alskýjaður, en ekki var skýhnoðri yfir akademíunni. Þeir sem urðu vitni að þessum undrum sögðu fullir aðdáunar að Kim Jong-Il væri svo sannarlega mikilmenni af himnum," sagði fréttastofan.

Seoul. AFP.