Erlent | AFP | 5.5.2004 | 7:37 | Uppfært 9:18

Þrjár sprengjur sprungu í Aþenu í morgunsárið

Lögregla í Aþenu rannsakar svæðið í kringum lögreglustöðina þar sem sprengjurnar sprungu í morgunsárið. AP

Þrjár sprengjur sprungu við lögreglustöð í Aþenu, höfuðborg Grikklands í morgunsárið. Sjúkrabíll var sendur eftir einum lögreglumanni eftir að þriðja sprengjan sprakk, að sögn BBC, en hann mun hafa særst lítillega. Sprengingarnar urðu 100 dögum áður en Ólympíuleikarnir hefjast í Aþenu, en leikarnir verða settir 13. ágúst í sumar. Að sögn gríska ríkissjónvarpsins urðu talsverðar skemmdir á lögreglustöðinni við sprengingarnar, en hún er staðsett í úthverfinu Kallithea, í suðurhluta Aþenu.

Svæðið í kringum lögreglustöðina var lokað af eftir að ónafngreindur maður hringdi í dagblað og varaði við sprengingunum, að því er grískur embættismaður segir.

„Fyrstu tvær sprengingarnar urðu með um fimm mínútna millibili. Sú þriðja sprakk um hálfri klukkustund síðar meðan sprengjusérfræðingar voru enn að leita að henni,“ sagði lögregluþjónn á staðnum.

Lögregla fann svo fjórðu sprengjuna og gat gert hana óvirka.

„Lögrelga tekur þetta mál afar alvarlega þar sem nú eru einungis þrír mánuðir í Ólympíuleikana,“ sagði lögregla á staðnum.

Gríska lögeglan og ríkisstjórnin segja þó engin tengsl milli sprengjanna í morgun og Ólympíuleikanna. Lögregla segir að öfgamenn á staðnum séu grunaðir um sprengjutilræðið. Evrypidis Styliandidis, aðstoðarutanríkisráðherra Grikkalands segir viðbrögð vegna sprengjutilræðsins vera öfgakennd. „Svipaðir hlutir hafa áður gerst,“ sagði hann.

Yfirvöld í Aþenu standa þessa dagana í ströngu við að ljúka undirbúningi fyrir Ólympíuleikana, sem standa frá 13. til 29. ágúst í sumar. Mikill öryggisviðbúnaður verður á leikunum vegna ótta um hryðjuverkaárásir á þeim.