Ísraelar segja ekki koma til greina að taka upp viðræður við Hamas

Varnarmálaráðherra Ísraels, Shaul Mofaz, sagði í dag að Ísraelar muni ekki ræða við Hamas-samtökin, þrátt fyrir að þau hafi unnið sigur í kosningum til palestínska þingsins í vikunni. „Við munum ekki undir nokkrum kringumstæðum ræða við Hamas,“ sagði Mofaz í viðtali við ísraelska sjónvarpsstöð. „Við viljum ekki með nokkrum hætti veita Hamas lögmæti.“

Mofaz sagði ennfremur að Ísraelar myndu ekki útiloka að í framtíðinni ráði þeir af dögum leiðtoga Hamas, þrátt fyrir að þeir kunni að taka sæti í heimastjórninni. „Enginn sem er í forsæti fyrir hryðjuverkasamtökum sem halda áfram að vinna hryðjuverk gegn Ísrael er öruggur,“ sagði hann. „Ef Hamas vinnur hermdarverk munu samtökin sæta harðari árásum Ísraela en nokkru sinni fyrr.“

• Blogga um frétt