Bandarísk kona talin hafa myrt barn sitt í örbylgjuofni

Kona í Bandaríkjunum hefur verið handtekin grunuð um að hafa myrt nýfætt barn sitt með því að setja það í örbylgjuofn. Barnið var mánaðargamalt þegar það lést fyrir um ári. Það var með innvortis brunasár, en engin sár utan á líkamanum, að því er skrifstofa réttarlæknis í Montgomery í Ohio greindi frá. Móðir barnsins neitar þessum ásökunum.

Barnið var látið þegar móðir þess kom með það á sjúkrahús í ágúst í fyrra. Hún var hneppt í varðhald um tíma, en sleppt á meðan rannsókn málsins var fram haldið. Rannsóknin reyndist torveld þar sem „ekki liggja fyrir margar vísindarannsóknir og gögn um áhrif örbylgja á manneskjur“, sagði Ken Betz, réttarlæknir í Montgomery.

Móðir barnsins segir að kvöldið áður en hún kom með það á sjúkrahús hafi það verið skilið eitt eftir hjá barnfóstru um stund. Foreldrana hafi ekki grunað að neitt væri að fyrr en barnið fannst meðvitundarlaust morguninn eftir.

• Blogga um frétt