14 ára piltur myrti föður, móður og bróður skammt frá Rúðu í Frakklandi

Franska lögreglan segist engar skýringar hafa á því hvers vegna 14 ára drengur skaut föður sinn, móður og fjögurra ára bróður og særði yngri systur sína skotsári í þorpinu Ancourteville-sur-Hericourt í Normandí, skammt frá borginni Rúðu.

Atvikið átti sér stað á heimili piltsins í gærkvöldi. Mun hann hafa gengið um húsið og hleypt af í allar áttir. Fundust lík föðurins, móðurinnar og bróður piltsins liggjandi í blóði sínu í eldhúsinu, svefnherbergi og í stiga milli hæða í endurbyggðu sveitabýli.

Tíu ára systurinni tókst að flýja út og gera nágrönnum viðvart þrátt fyrir að vera alvarlega sár á brjósti og með sködduð lungu.

Lögreglan fann dregninn hálfri annarri stundu seinna en hann hafði flúið af vettvangi á reiðhjóli. Var hann þá mjög úr jafnvægi.

Talsmenn lögreglunnar segjast ekki hafa fengið á því skýringar hvað olli því að drengurinn greip til skotvopnsins og framdi ódæðið. Uppnám er í Ancourteville-þorpinu en íbúar þess eru 218 talsins. „Þetta var venjuleg fjölskylda og engin vandamál henni tengd, ekki heldur börnunum. Eitthvað virðist hafa gerst á sekúndubroti í höfði piltsins,“ segir varaoddviti þorpsins, Francis Leroux, við blaðið Le Parisienne.

Að sögn blaðsins hefur drengurinn reynst ósamvinnuþýður við lögreglu og engin tilfinningamerki sýnt við yfirheyrslur.

• Blogga um frétt