Franz Ferdinand leikur í Kaplakrika

Skoska hljómsveitin Franz Ferdinand mun halda tónleika í Kaplakrika í Hafnarfirði 27. maí næstkomandi. Um er að ræða einhverja vinsælustu hljómsveit Bretlands um þessar mundir og hefur hlotið fjölda verðlauna, bæði í Bretlandi og víðar.

Hljómsveitin var stofnuð haustið 2001 í Glasgow. Hljómsveitin hét upphaflega The Chateau. Fyrsta smáskífa sveitarinnar kom út sumarið 2003 en sú næsta snemma á síðasta ári með laginu Take Me Out, og í kjölfarið kom út breiðskífan Franz Ferdinand. Væntanleg er ný plata frá þeim í lok sumars og má gera ráð fyrir því að eitthvað henni verði komið inn í dagskrána hjá þeim í vor.

Hr. Örlygur stendur fyrir tónleikunum í Kaplakrika en fram kemur í tilkynningu að miðasala og upplýsingar um upphitunarsveitir verði auglýstar síðar.

• Blogga um frétt