British Airways að hefja áætlunarflug til Íslands

Breska flugfélagið British Airways hefur áætlunarflug milli Gatwick í London og Keflavíkur í mars á næsta ári. Flogið verður fimm sinnum í viku frá og með sunnudeginum 26. mars 2006, á mánudögum, miðvikudögum, föstudögum, laugardögum og sunnudögum. Verð á farmiðum verður frá 22.990 krónum með sköttum.

Í tilkynningu frá félaginu kemur fram, að brottför 26. mars frá Gatwick verði kl. 7:30 að staðartíma og koma til Keflavíkur kl. 9:45. Flogið verður til baka frá Keflavík þremur korterum síðar eða kl. 10:30 og komið til Gatwick kl. 14.35 að staðartíma.

Í tilkynningunni er haft eftir Sam Heine, viðskiptastjóra BA fyrir Skandinavíu og Ísland, að þessi nýja flugleið færi Íslendingum ekki aðeins möguleika á að ferðast til London á þægilegum tíma heldur einnig möguleika á greiðri tengingu við leiðanet BA um allan heim, sem telur 151 áfangastað í 72 löndum.

Upplýsingar um fargjöld eru að finna á vefsetri British Airways frá og með deginum í dag vegna brottfarar frá og með 26. mars 2006.

Vefsvæði British Airways

• Blogga um frétt