Gestaleigum gengum vel á Indlandi

Fyrirtæki á Indlandi, sem sérhæfir sig í því að leigja brúðhjónum, sem óttast að fáir komi í brúðkaupveisluna, gesti, segir viðskiptin blómstra. Fyrirtækið, sem heitir Best Guest Centre og er í borginni Jodhpur í Rajasthanhéraði, ætlar nú að færa út kvíarnar og bjóða brúðhjónum í fleiri héruðum að leigja sér gesti.

Að því er fram kemur á fréttavefnum Ananova þurfa brúðhjónin ekki að óttast að gestunum leiðist. Gestirnir, sem koma ýmist í hefðbundnum indverskum klæðnaði eða fötum að hætti Vesturlandabúa, bæði dansa og spjalla við aðra gesti í brúðkaupinu. Þeir greina hins vegar aldrei frá því að þeir séu leigðir til starfans.

M. I. Syed, framkvæmdastjóri fyrirtækisins, segir leigugestunum það mikilvægasta sem þeir þurfa að vita um brúðhjónin og fjölskyldur þeirra áður en veisluhöldin hefjast. Segir hann nauðsynlegt að bjóða upp á þjónustu sem þessa þar sem fjölskyldur hafi minnkað í kjölfar samfélagsbreytinga. Að hans sögn er ástæðan fyrir þessari auknu eftirspurn eftir leigugestum sú að stórfjölskyldan sé fyrir bí og því óttist brúðhjón að færri gestir komi í brúðkaupið.

• Blogga um frétt