Erlent | mbl | 26.9.2005 | 12:00 | Uppfært 13:05

Fundinn sekur um aðild að hryðjuverkaárásunum á Bandaríkin

Imad Eddin Barakat Yarkas var í dag dæmdur í 27 ára fangelsi á Spáni.

Spænskur dómstóll fann í dag Sýrlendinginn Imad Eddin Barakat Yarkas sekan um aðild að skipulagningu hryðjuverkaárásanna á Bandaríkin 11. september 2001. Yarkas, sem talinn er vera leiðtogi al-Qaeda hryðjuverkasamtakanna á Spáni, var dæmdur í 27 ára fangelsi. Alls voru 24 menn verið ákærðir fyrir að tengjast al-Qaeda á Spáni og voru kveðnir um dómar yfir þeim í dag. Sex voru sýknaðir en hinir dæmdir í 6-11 ára fangelsi.

Saksóknarar kröfðust þess að Yarkas yrði dæmdur í 74.377 ára fangelsi fyrir aðildina að hryðjuverkaárásunum eða í 25 ára fangelsi fyrir hvern þann 2973 einstakling sem talinn er hafa látið lífið í árásunum á New York og Washington og 12 ár að auki fyrir að vera forvígismaður al-Qaeda.

Sjónvarpsfréttamaðurinn Tayssir Alluni var einnig fundinn sekur um samvinnu við al-Qaeda og dæmdur í 7 ára fangelsi.

Yarkas, sem er 42 ára, er talinn hafa stýrt hópi sem útvegaði fjármagn og búnað vegna hryðjuverkaárásanna á Bandaríkin. Var hann sakaður um að hafa skipulagt fund í júní 2001 sem Mohammed Atta, leiðtogi hópsins sem gerði árásirnar á Bandaríkin, sat.

Yarkas sagðist vera saklaus af öllum ákærum, sagðist ekkert vita um Osama bin Laden, leiðtoga al-Qaeda og fordæmdi árásirnar á Bandaríkin.

Annar sakborningur, Marokkómaðurinn Driss Chebli, var einnig ákærður fyrir að hafa tekið þátt í að skipuleggja fundinn með Atta. Hann var sýknaður af morðákæru en fundinn sekur um samstarf við hryðjuverkasamtök og dæmdur í 6 ára fangelsi.

Ghasoub al-Abrash Ghalyoun var sýknaður af ákæru um aðild að undirbúningi hryðjuverkanna. Hann tók myndbönd af World Trade Center í New York og fleiri byggingum í Bandaríkjunum þegar hann var á ferð í Bandaríkjunum 1997. Spænski rannsóknardómarinn Baltasar Garzon, sem ákærði mennina 24 árið 2003, sagði að þessum myndböndum hefði verið komið í hendur al-Qaeda og mætti rekja upphaf skipulagningar hryðjuverkaárásanna til þess. Ghalyoun sagði hins vegar við réttarhöldinn að um væri að ræða saklausar myndir sem hann hefði tekið sem ferðamaður.