Fullyrt að Harry Potter deyi í síðustu bókinni

Fregnir herma að JK Rowling, höfundur bókanna um Harry Potter, sé búin að fá sig fullsadda af söguhetjunni og í síðustu bókinni endi galdarastrákurinn lífdaga sína. Bandaríski leikarinn Jim Dale, sem les bækurnar inn á hljóðsnældur, segir að Rowling hafi fyrir skömmu játað að í sjöundu bókinni, sem hún er nú að skrifa, ljúki sögu Harrys Potters.

Dale greindi ekki frá því hvernig Harry safnist til feðranna. Sjálf hefur Rowling aldrei viljað segja margt um framtíð Harrys og félaga hans. Þegar hún var nýlega spurð hvort hann verði einhverntíma fullorðinn svaraði hún: „Þið verðið að bíða og sjá hvort hann lifir nógu lengi til að komast á fullorðinsár.“

Daniel Radcliffe, sem leikur Harry í kvikmyndunum, hefur einnig trú á að strákurinn muni deyja. „Ég held að það geti verið að hann verði myrtur í síðustu bókinni.“

• Blogga um frétt