Klíndi tyggjói á málverk sem metið er á hundrað milljónir

12 ára gamall drengur og safngestur listasafns í Detroit klíndi tyggigúmmíi á málverk eftir Helen Frankenthaler í fyrradag. Verkið er metið á 1,5 milljónir dollara, tæpar hundrað milljónir króna. Tyggjóklessan skildi eftir sig blett í málverkinu á stærð við tíkall.

Drengurinn var í bekkjarferð og ákvað að bæta við abstraktverk Frankenthaler, Flóann (e. The Bay) með fyrrgreindum hætti. Varðveisludeild safnsins mun nú rannsaka hvaða efni er hægt að nota til að leysa blettinn upp. Drengnum var vikið tímabundið úr skólanum og fékk þar að auki skammarræðu frá foreldrum sínum. Listavefurinn Artinfo greinir frá þessu.

• Blogga um frétt