Óttast átök er Gay Pride fer fram í Jerúsalem

Mikil spenna er í Jerúsalem vegna fyrirhugaðrar gleðigöngu samkynhneigðra Gay Pride í borginni á föstudag. Til óláta hefur komið á götum borgarinnar undanfarin kvöld þar sem bókstafstrúaðir gyðingar hafa mótmælt göngunni. Þá hafa skipuleggjendur göngunnar greint frá því að þeim hafi verið boðið mikið fé fyrir að flytja gönguna annað. Þetta kemur fram á fréttavef Ha’aretz.

Uri Lupolianski, borgarstjóri Jerúsalem, var grýttur af mótmælendum í gærkvöldi en Lupolianski, sem sjálfur er bókstafstrúargyðingur, hefur hvatt til þess að göngunni verði aflýst. Hæstiréttur landsins veitti leyfi fyrir göngunni fyrir nokkrum mánuðum en lögregla hefur nú neytt skipuleggjendur göngunnar til að breyta fyrirhugaðri gönguleið og til stendur að 12.000 lögreglumenn standi vörð um gönguna. Þá verða þrjú mál tekin fyrir í hæstarétti landsins síðar í dag, en þau eru öll höfðuð af andstæðingum göngunnar í því skyni að fá hana bannaða.

• Blogga um frétt