Menntaskólinn við Sund mótmælir lokun íþróttaaðstöðu

Menntaskólinn við Sund hefur sent Umhverfissviði Reykjavíkurborgar bréf þar sem brugðist er við ákvörðun um tafarlausa lokun íþróttaaðstöðu skólans. Þar er ákvörðuninni harðlega mótmælt og sagt að sú ákvörðun sé í engu samræmi við tilefnið. Jafnframt hefur vinnubrögðum skoðunaraðila verið mótmælt en yfirvöld skólans vissu ekki, að úttekt hafi farið fram á íþróttahúsnæðinu.

Á heimasíðu skólans segir, að í bréfinu til Umhverfissviðs sé jafnframt bent á rangfærslur og hrein ósannindi í lokunartilkynningunni en það hljóti að vera alvarlegt mál þar sem þau voru notuð til stuðnings ákvörðuninni.

Menntaskólinn við Sund hefur boðið sviðstjóra Umhverfissviðs að koma og skoða stöðu hreinlætismála og öryggismála í íþróttaaðstöðunni. Segir á heimasíðu skólans, að það boð hafi enn ekki verið þegið og verði íþróttaaðstaðan því lokuð að minnsta kosti þar til einhver viðbrögð komi frá Umhverfissviði Reykjavíkurborgar.

• Blogga um frétt