Innlent | mbl | 18.1.2008 | 14:26 | Uppfært 15:26

„Sagan mun dæma Bandaríkjamenn"

Mynd 1 af 18 Bobby Fischer Sverrir

Mynd 2 af 18 Fischer og Sæmundur Pálsson á blaðamannafundi á Hótel Loftleiðum eftir að Fischer kom hingað til lands árið 2005. Sverrir

Mynd 3 af 18 Guðmundur G. Þórarinsson tekur á móti Fischer árið 2005. Sverrir

Mynd 4 af 18 Fischer hafði ekki tíma til að raka sig áður en hann kom til landsins. Sverrir

Mynd 5 af 18 Fischer og Sæmundur Pálsson á blaðamannafundi á Hótel Loftleiðum eftir að Fischer kom hingað til lands árið 2005. Sverrir

Mynd 6 af 18 Fischer og Guðmundur G. Þórarinsson við skákborðið, sem notað var í einvíginu 1972. Golli

Mynd 7 af 18 Fischer látinn RAX

Mynd 8 af 18 Fischer látinn RAX

Mynd 9 af 18 Sæmundur Pálsson, Fischer og Miyoko Watai, unnusta Fischers, eftir að hann fékk í hendur ríkisfangsbréf sitt. Golli

Mynd 10 af 18 Lothar Schmidt, sem var dómari í skákeinvíginu í Reykjavík árið 1972. Golli

Mynd 11 af 18 Boris Spassky kom til Íslands árið 2006 og hitti Fischer. Golli

Mynd 12 af 18 Fischer stikar um á sviði Laugardalshallar árið 1972 Ólafur K. Magnússon

Mynd 13 af 18 Fischer kemur til taflmennsku í Laugardalshöllinni. Ólafur K. Magnússon

Mynd 14 af 18 Fischer gefur eiginhandaráritanir árið 1972. Ólafur K. Magnússon

Mynd 15 af 18 Boris Spassky og Bobby Fischer tefla örlagaríkt einvígi í Sveti Stefan í Svartfjallalandi árið 1992.

Mynd 16 af 18 Bobby Fischer, 15 ára, og Tigran Petrosian tefla í Moskvu árið 1958.

Mynd 17 af 18 Fischer og Spassky tefla síðustu einvígisskákina í Reykjavík.

Mynd 18 af 18 Bobby Fischer árið 1971.

Heimsmeistaraeinvígið í skák fór fram í Laugardalshöll árið 1972 en þar mættust heimsmeistarinn Boris Spassky frá Sovétríkjunum til vinstri og bandaríski áskorandinn Bobby Fischer. KRISTINN BENEDIKTSSON

Guðmundur G. Þórarinsson, fyrrverandi forseti Skáksambands Íslands, segist telja að sagan muni dæma Bandaríkjamenn hart fyrir það hvernig þeir komu fram við skáksnillinginn Robert Fisher sem lést hér á landi í gær.

„Þetta var ein skærasta stjarna skákheimsins fyrr og síðar og það er alveg hörmulegt hvernig komið var fram við hann,” sagði Guðmundur í samtali við blaðamann mbl.is í dag.

„Hann var útskúfaður og hundeltur fyrir það eitt að færa trémenn af hvítum reitum á svarta í Júgóslavíu á grundvelli reglugerðar sem bannaði samskipti við Júgóslavíu. Hann er eini maðurinn sem ákærður hefur verið fyrir brot á þessari reglugerð en vopnaframleiðendur sem brutu gegn henni hafa ekki einu sinni verið ákærðir."

Guðmundur segir það fyrsta sem komi upp í huga sinn við fráfall Fishers sé gleði yfir því að stuðningshópi hans hér á landi hafi tekist að ná honum úr fangelsi í Tókýó og að honum skyldi vera veitt honum hæli hér á landi þannig að hann gæti átt nokkur þolanleg ár undir lok ævi sinnar.

„Hann var einfari og einstæðingur en átti vini hér sem studdu hann. Mér fannst færast ákveðin ró yfir hann fyrst eftir að hann kom hingað enda fékk hann að mestu að vera í friði hér. Undir það síðasta leið honum hins vegar ekki vel og maður fann það.”

Guðmundur var einn af skipuleggjendum heimsmeistaraeinvígisins í Laugardalshöll árið 1972 og segir það hafa verið átakasaman tíma sem hafi reynt á alla sem unnu að framkvæmd mótsins.

„Loftið var þrungið spennu og það gekk á ýmsu. Oftar en einu sinni riðaði öll framkvæmdin og við héldum að við værum að missa hana út úr höndunum á okkur,” segir hann.

Guðmundur segist þó ekki hafa haft mikil bein samskipti við Fisher á þessum tíma heldur hafi hann aðallega verið í samskiptum við lögfræðinga hans og aðstoðarmenn. Hann hafi hins vegar kynnst Fisher persónulega er hann heimsótti hann í fangelsið í Japan og eftir að Fisher flutti hingað til lands.

„Þá kynntist ég því að hans innri maður var ólíkur þeim harða keppnismanni sem þjóðin kynntist árið 1972,” segir Guðmundur. „Hann var vissulega haldinn ákveðinni þráhyggju en var einnig mikill hugsjónamaður og allra manna hjálplegastur.”