Mikið áfall fyrir borgarbúa

„Ég frétti nú fyrst af þessu í nótt þegar mamma hringdi í mig frá Íslandi og vakti mig,“ segir Esther Ágústa Berg sem býr í Mumbai á Indlandi þar sem mikið hættuástand ríkir nú vegna árásar vopnaðra vígamanna á hótel og aðra vinsæla ferðamannastaði í borginni.

Hún segir þetta mikið áfall fyrir borgarbúa þar sem Mumbai hafi til þessa verið mjög róleg og örugg borg. „Þetta er gríðarlega stór borg og ég bý í miðri borginni en atburðirnir áttu sér stað í suðurhlutanum. Við höldum okkur bara inni við núna en það er engin umferð á götunum og útgöngubann í suðurhlutanum,“ segir Ágústa sem býr ásamt eiginmanni og fjögurra ára dóttur í Mumbai. Þau séu örugg fjarri átakasvæðinu og fylgist með í gegnum fjölmiðla.

Ágústa var stödd á Marriott-hóteli í gærkvöldi og fór þaðan út um tíuleytið. Hún segir að um ellefuleytið hafi komið til skotbardaga í nágrenni hótelsins. Ágústa segir að stór þakkargjörðarhátíð hafi átt að fara fram á einu Taj hótela borgarinnar í kvöld en af því verði ekki.