Reykskynjarar björguðu miklu

Eldur kviknaði í sumarbústað í landi Efri-Reykja í Laugardal í nótt. Karl og kona sem dvöldu í bústaðnum vöknuðu við reykskynjara og sluppu ósködduð. Karlinum tókst að slökkva eldinn en nokkrar skemmdir urðu á bústaðnum af völdum elds og reyks. 

Tilkynning um eldinn barst kl. 3.10 í nótt. Fólkið vaknaði við að reykskynjari fór í gang. Þá var eldur í uppþvottavél og hafði hann læst sig í eldhúsinnréttinguna. Húsráðandi tengdi slöngu og slökkti eldinn og hringdi svo í slökkvilið. Lögreglan fór á staðinn en þar eð eldurinn hafði verið slökktur var engin þörf á slökkviliði.

Að sögn lögreglunnar á Selfossi er uppþvottavélin ónýt og líklega eldhúsinnréttingin. Þá urðu einnig skemmdir vegna reyks og sóts í sumarhúsinu. Lögreglan sagði að bústaðurinn hafi verið vel búinn reykskynjurum og eru þeir taldir hafa bjargað því að ekki fór verr. 

• Blogga um frétt