IKEA innkallar barnastóla

IKEA biður viðskiptavini sína sem eiga Leopard barnastól að hætta strax að nota stólinn og skila sætinu og grindinni til IKEA. Tekið er á móti stólnum í Skilað og skipt og verður hann að fullu endurgreiddur.

Smellulásar sem festa sætið við grindina eiga það á hættu að brotna sem getur valdið því að sætið dettur niður um grindina. Börn geta orðið fyrir meiðslum á höfði og öðrum líkamshlutum við það að detta og þeim getur stafað köfnunarhætta af lausum smellulásum.

IKEA hefur fengið ellefu tilkynningar vegna brotinna smellulása frá kaupendum í Evrópu. Þar á meðal er eitt tilvik þar sem sæti stólsins datt niður um grindina á meðan barn sat í því. Barnið marðist á fótleggjum. Í öðru tilviki fannst laus smellulás í munni barns en hann var fjarlægður áður en skaði hlaust af.

Ekki hafa borist fleiri tilkynningar um slys eða meiðsl, að því er segir í tilkynningu frá IKEA.

• 1 blogg um fréttina

Bloggað um fréttina

• Jakob Falur Kristinsson: Gallaður barnastóll