Innlent | mbl | 1.4.2010 | 16:02 | Uppfært 17:29

„Stórkostleg sjón“

Mynd 1 af 10 Nýja gossprungan á Fimmvörðuhálsi var tilkomumikil. Ragnar Axelsson

Mynd 2 af 10 Gosstöðvarnar á Fimmvörðuhálsi. Upphaflega gossprungan er fyrir miðri mynd en hægra megin sést sprungan sem opnaðist í gær. Ragnar Axelsson

Mynd 3 af 10 Á myndinni sést vel hvernig hraunið rennur úr nýju sprungunni niður í Hvannárgil. Ragnar Axelsson

Mynd 4 af 10 Hraun rennur úr nýju sprungunni niður í Hvannárgil. Ragnar Axelsson

Mynd 5 af 10 Gamla gossprungan á Fimmvörðuhálsi. Heldur hefur dregið úr eldvirkni þar. Ragnar Axelsson

Mynd 6 af 10 Gosstöðvarnar á Fimmvörðuhálsi. Vinstra megin sést upphaflega sprungan en sú nýja er hægra megin. Ragnar Axelsson

Mynd 7 af 10 Talsvert hraun rennur úr nýju gossprungunni. Ragnar Axelsson

Mynd 8 af 10 Gamla gossprungan á Fimmvörðuhálsi. Ragnar Axelsson

Mynd 9 af 10 Nýja gossprungan á Fimmvörðuhálsi. Talsverð umferð flugvéla var yfir gosstöðvunum í morgun. Ragnar Axelsson

Mynd 10 af 10 Hrauntaumur rennur úr nýju sprungunni ofan í Hvannárgil. Ef vel er athugað sést flugvél fyrir miðri mynd. Ragnar Axelsson

„Þetta var stórkostleg sjón að sjá nýju sprunguna og hvernig hraunið flæðir niður í gilin með tilkomumiklum hætti,“ segir Ragnar Axelsson (RAX) ljósmyndari Morgunblaðsins sem flaug yfir gossvæðið eldsnemma í morgun. Segir hann að ekki hafi verið þverfótandi fyrir flugvélum í morgun þegar hann flaug yfir svæðið.

Nýja gossprungan sem opnaðist á Fimmvörðuhálsi í gærkvöldi er skammt norðan við þá gömlu. Að sögn Ragnars er hún svipuð stór og sú gamla og virðist álíka öflug.

Búist er við talverðum fjölda ferðalanga á Fimmvörðuhálsinn seinna í dag, en flestir reyna að vera við gosstöðvarnar í ljósaskiptunum þegar gosið er tilkomumest.