Vatnalög frestast til 2011

Gildistöku vatnalaga verður frestað til 1. október 2011. Samkomulag náðist um þetta milli stjórnar og stjórnarandstöðu í kvöld. Í samkomulaginu felst að frumvarp um breytingu á vatnalögum verður lagt fram í haust.

Ný vatnalög voru samþykkt árið 2006, en miklar deilur urðu um frumvarpið á þingi. Þáttur í samkomulag um afgreiðslu málsins var að gildistöku  laganna var frestað til 1. júlí 2010. Iðnaðarráðherra lagði fram frumvarp í vor um að lögin yrðu afnumin, en stjórnarandstaðan var því andsnúin og lagði til að gildistökunni yrði frestað og reynt yrði að ná samkomulagi um þau atriði laganna sem mestur ágreiningur er um.

Stjórnarliðar féllust á þetta gegn því að önnur mál sem þeir leggja áherslu á fengju afgreiðslu á þessu þingi.

Iðnaðarráðherra hefur kynnt frumvarpsdrög, sem nú er unnið að í ráðuneytinu, fyrir iðnaðarnefnd ásamt minnisblaði um þau skilgreindu atriði sem þarfnast frekari skoðunar og vinnslu áður en hægt er að leggja frumvarpið fram á Alþingi. Það eru einkum atriði sem lúta að almannarétti og skilgreiningu á nýtingarrétti. Til að ljúka þeirri vinnu hefur iðnaðarráðherra leitað til hæstaréttarlögmannanna Karls Axelssonar og Ástráðs Haraldssonar. Þeir munu í sameiningu fara yfir frumvarpsdrögin út frá minnisblaði ráðherra í samráði við lögfræðinga ráðuneytisins og hópinn sem vann drögin og skila tillögum sínum í haust.

• Blogga um frétt