Einungis 3,6% landsmanna eru almennt mjög ánægð með störf ríkisstjórnarinnar á sama tíma og 56,3% eru almennt fremur eða mjög óánægð með störfin.
Þetta kemur fram í nýrri könnun Maskínu um viðhorf til ríkisstjórnar og stjórnarandstöðu.
Kjósendur Sjálfstæðisflokksins eru ánægðastir með störf ríkisstjórnarinnar, en 51% þeirra sögðust ánægð með störf ríkisstjórnarinnar og 13% óánægð.
Kjósendur Sósíalistaflokksins eru hvað óánægðastir með störf ríkisstjórnarinnar, eða 90% þeirra.
Séu niðurstöður könnunarinnar skoðaðar út frá því hvort svarendur kjósi ríkisstjórnarflokkana eða stjórnarandstöðuflokkana má sjá að 75% kjósenda stjórnarandstöðuflokkanna eru óánægð með störf ríkisstjórnarinnar og 5% ánægð.
Á sama tíma eru 45% kjósenda ríkisstjórnarflokkanna ánægð með störf ríkisstjórnarinnar en 16% óánægð.
Sé þróunin skoðuð eftir ársfjórðungum má sjá að óánægja með störf ríkisstjórnarinnar fór niður um tvö prósentustig frá fyrsta ársfjórðungi ársins til annars ársfjórðungs. Á sama tíma jókst ánægja um eitt prósentustig.
Hvað ánægju með störf stjórnarandstöðunnar varðar má sjá að ánægja eykst um tvö prósentustig milli ársfjórðunga á meðan óánægja minnkar um tvö prósentustig.
Eru 12% svarenda þannig mjög eða fremur ánægð með störf stjórnarandstöðunnar á meðan 39,3% svarenda eru mjög eða fremur óánægð með störfin.
Kjósendur Pírata eru hvað ánægðastir með störf stjórnarandstöðunnar, eða 20,5% þeirra, á meðan einungis 2,7% kjósenda Sósíalistaflokksins sögðust ánægð með störf stjórnarandstöðunnar.
Kjósendur Sósíalistaflokksins voru óánægðastir með störf stjórnarandstöðunnar, eða 54,3%. Fæstir kjósendur Samfylkingarinnar voru ósáttir við störfin, eða einungis 24,6%.
Könnunin fór fram frá apríl til júní og voru svarendur 7.798 talsins.