Eldsneyti er komið aftur á dælurnar á bensínstöð N1 í Staðarskála í Hrútafirði. Bensínleysið varði í yfir tvo klukkutíma.
Þetta staðfestir Ásta Sigríður Fjeldsted, forstjóri Festi, í samtali við mbl.is.
Um klukkan 15 greindi mbl.is frá því að eldsneytislaust væri í Staðarskála. Ásta segir þetta mjög leiðinlegt fyrir viðskiptavini, en að mannleg mistök hjá Olíudreifingu hafi valdið bensínleysinu.
Staðarskáli er ein mest sótta eldsneytisstöð landsins og bensínleysið ber að einmitt þegar stefnir í mikla ferðahelgi, þar sem N1-mótið í knattspyrnu er haldið á Akureyri.