Engin stefna um fjölda apóteka

Hvorki Reykjavíkurborg né Kópavogsbær hafa myndað sér stefnu er varðar fjölda og staðsetningu apóteka og ólíklegt er að slík stefna verði mynduð.

Frétt af mbl.is

Lítill sveigjanleiki frekar vandamálið

Í vikunni hefur Morgunblaðið fjallað um málefni lyfjafræðinga og skort á faglærðu starfsfólki í lyfjabúðum. Deildarforseti lyfjafræðideildar HÍ velti því upp hvort apótek, sérstaklega á höfuðborgarsvæðinu, væru ekki of mörg og vildi meina að fjöldinn gæti bitnað á starfsaðstæðum lyfjafræðinga.

Þá sagði forstjóri Lyfjastofnunar að það væri ekki stofnunarinnar að hafa skoðun á fjölda apóteka en eftir vandlega athugun væri það helst borgin og sveitarfélög sem geti sett skorður á fjöldann.

Sem stendur eru 50 apótek starfandi á höfuðborgarsvæðinu. Þar af er 31 í Reykjavík.

Man ekki eftir umræðu um fjölda apóteka

Hjálmar Sveinsson, borgarfulltrúi Samfylkingar og fulltrúi í umhverfis- og skipulagsráði, segist ekki vita til þess að borgin hafi myndað sér stefnu í þessum málum og hann man ekki eftir því að apótek hafi nokkurn tímann verið sérstaklega rædd í ráðinu.

Spurður hvort hann sjái fyrir sér að borgin komi til með að mynda sér stefnu um lyfjabúðir og fjölda þeirra segir Hjálmar: „Fyrst um sinn virkar það aðeins langsótt.“ Hann bætir við að þeir sem reka apótek þurfi að finna út úr því sjálfir hve margra apóteka er þörf.

Þá bendir hann á eðlismun apóteka í samanburði við t.d. bensínstöðvar: „Öfugt við bensínstöðvarnar eru þau ekki að taka upp neitt verðmætt byggingarpláss í borginni.“

Athygli vekur að níu apótek eru í Kópavogi en samkvæmt formanni skipulagsráðs bæjarins, Hjördísi Ýr Johnson, hefur málið ekki verið rætt í nefndinni og engin stefna um fjölda apóteka til staðar í bænum.